Той моцны, хто ведае свае карані
Пра важнасць далучэння дзяцей да культуры свайго народа напісана шмат, бо зварот да бацькоўскай спадчыны выхоўвае павагу, гонар за зямлю, на якой жывеш.
Менавіта такі акцэнт робяць у сваёй працы педагогі батвінаўскага садка, з маленства далучаючы дзяцей да культуры продкаў, вучаць іх з павагай і цікавасцю ставіцца да традыцый розных народаў. Дарэчы, тут створаны ўсе ўмовы, каб вызваць у хлопчыкаў і дзяўчынак цікавасць да сваёй этнічнай прыналежнасці. З мэтай знаёмства з жыццём і побытам продкаў ва ўстанове адукацыі створаны музейны пакой «Беларуская хатка». Многія экспанаты сабраны па навакольных вёсках, маюць шматгадовую гісторыю і знаёмяць дзяцей з побытам селяніна. Куток увесь час папаўняецца. А самае галоўнае, што рабяты і іх бацькі прымаюць актыўны ўдзел у жыцці міні-музея.
Выхаванне новага пакалення немагчыма без выкарыстання папярэдняга вопыту, так лічаць выхавацелі садка. А таму знаёмства з беларускімі гульнямі і цацкамі, дэкаратыўна-прыкладным мастацтвам, народнымі традыцыямі і абрадамі, вывучэнне выхаванцамі сімволікі Рэспублікі Беларусь, пазнанне роднай мовы як каштоўнасці народа – асноўныя напрамкі ў рабоце. Бацькі рабят не застаюцца ў баку, удзельнічаюць у ранішніках, пазнавальна-выхаваўчых гульнях, арганізацыі музычных забаў, народных і фізкультурных святах. Але ж асабліва памятнымі ў бягучым годзе сталі заняткі «Лялькі з саломы і ільну», «Ганчарныя вырабы», «Літаратурныя вячоркі», «Вандраванне ў горад майстроў» і іншыя. Варта адзначыць, што ў музеі штотыдзень працуе гурток ткацтва «Умелыя ручкі», дзе выхаванцы 4-6-гадовага ўзросту спасцігаюць не толькі тэхналогію рамяства, а яшчэ знаёмяцца з культурай народа, традыцыямі, звычаямі. Дашкаляты ведаюць, што ўсе арнаменты і ўзоры на вырабах, гэта не проста ўпрыгожванне. У кожным з іх заключаецца асабісты патаемны сэнс. Выхаванцы вучацца чытаць гэтыя сімвалы, што дае магчымасць дзецям не толькі развіваць творчы патэнцыял, а і ўявіць сваю нацыянальнаю самасвядомасць. А яшчэ, самае галоўнае, вучыць з любоўю ставіцца да Радзімы.
