НА ЛЫЖЫ СТАНАВІСЯ!
Марозная раніца, шэрань на верхавінах елак, сонейка скача па галінках бяроз, а аматары лыжных гонак сабраліся каля судзейскага стала, каб запісацца ў чаргу на старт. Усяго ў эстафеце прынялі ўдзел 37 каманд арганізацый і прадпрыемстваў раёна, з якіх 19 разыгралі ўзнагароды спаборніцтва згодна палажэнню. Пакуль адны нацягвалі спартыўны абутак, разміналіся перад забегам і спрабавалі лыжамі снег, іншыя завіхаліся каля вогнішчаў, на якіх варылася апетытная юшка і смажыліся духмяныя шашлыкі.
Мінулая “Чачэрская лыжня” на гэты раз насіла характар і спартыўнага спаборніцтва, і вясёлай гульні. Бо некаторыя ўдзельнікі абуліся ў лыжы першы раз за апошнія некалькі гадоў пасля заканчэння школы. Таму іх мэтай было не столькі прайсці дыстанцыю на хуткасць, колькі наогул дайсці да фінішу. Асобных лыжнікаў балельшчыкі сустракалі на фінішы моцнымі апладысментамі, а за некаторымі “першапраходцамі” нават ішлі ў гушчу лесу і дапамагалі і маральна, і фізічна, бо падняцца на крутую гару без спецыяльнай трэніроўкі многім было няпроста. Але яны ўпарта ірваліся наперад, не сыходзілі з трасы нават тады, калі ламаўся спортінвентар, і подбегам, на адной лыжы завяршалі гонку. А тыя, хто сур’ёзна ставіў перад сабой мэту, дабіўся станоўчых вынікаў і падняўся на вяршыню славы. Разбавілі абстаноўку, надавалі спартыўнага запалу і не дазвалялі сумаваць у гэты дзень тэатралізаваныя героі: дапытлівая Бабя Яга, шэры Зайчык, вясёлая бабуля Матруна скакалі, жартавалі, падбадзёрвалі лыжнікаў і раздавалі ім невялічкія сувеніры для добрага настрою. А са спартыўным сімвалам – алімпійскім Мішкам – кожны, хто хацеў, мог зрабіць фота на памяць.
Пераадольваючы цяжкія кіламетры, абганяючы сапернікаў і не звяртаючы ўвагі на мароз, удала справіліся з заданнем і заваявалі перамогу наступныя ўдзельнікі: лепш і хутчэй за астатніх прайшлі дыстанцыю аматары лыжнага бегу з ААТ “МатнявічыАгра”, на другім месцы каманда КЖУП “Чачэрскае” і трэцімі перасягнулі фінішную лінію работнікі падатковай інспекцыі. Адным – медалі і Дыпломы, а другім – добры настрой і пазітыўны зарад на ўвесь тыдзень.
